ಎಲ್ಲಿದೆ..?

ನಾನು ಅಂತಮೂರ್ಖಿಯಾದಾಗ ನನ್ನ ಕಾಡುವ ಪ್ರಶ್ನೆಗಳು ..


ಎಲ್ಲಿದೆ..?

ಎಲ್ಲಿದೆ ಬಣ್ಣವಿಲ್ಲದ ಬದುಕು
ಎಲ್ಲಿದೆ ಅಂಧತ್ವ ದೂರ ಮಾಡುವ ಬೆಳಕು
ಎಲ್ಲಿದೆ ಸಾವಿಲ್ಲದ ,ನೋವಿಲ್ಲದ ಜೀವ
ಎಲ್ಲಿದೆ ಏನನ್ನು ಆಪೇಕ್ಷಿಸದ ಭಕ್ತಿಭಾವ

ಎಲ್ಲಿದೆ ತಾಯ್ತನ ಮರೆತ ಹೆತ್ತ ಕರಳು
ಎಲ್ಲಿದೆ ಸತ್ಯ ಹೇಳುವ ಪಡಿನೆರಳು
ಎಲ್ಲಿದೆ ನಾವಾಡುವ ಮಾತಿನಲ್ಲಿ ನಿವೇದನೆ
ಎಲ್ಲಿದೆ ನಮ್ಮ ಕರ್ತವ್ಯದ ಸಂವೇದನೆ

ಎಲ್ಲಿದೆ ಮಾತನಾಡುವ ಮೌನ
ಎಲ್ಲಿದೆ ಒಪ್ಪಿ,ಅಪ್ಪಿ ನೀಡುವ ಸನ್ಮಾನ
ಎಲ್ಲಿದೆ ನಾನು-ನನ್ನದೆನ್ನುವದಕ್ಕೆ ಕಾರಣ
ಎಲ್ಲಿದೆ ಸಾವಿಗೂ ನೀಡುವ ಆಮಂತ್ರಣ

ಎಲ್ಲಿದೆ ದೇಹ ಮನಸಿಗೂ ಅಂತರ
ಎಲ್ಲಿದೆ ಬದಲಾವಣೆ ತರೋ ಮನ್ವಂತರ
ಎಲ್ಲಿದೆ ಸೋಲು ನೋಡದ ಗೆಲವು
ಎಲ್ಲಿದೆ ನೋವು ನೀಡದ ಒಲವು

ಎಲ್ಲಿದೆ ಎಲ್ಲ ತಿಳಿಸುವ ಪುಸ್ತಕ
ಎಲ್ಲಿದೆ ಎಲ್ಲ ಬುದ್ಧಿ ಇರುವ ಮಸ್ತಕ
ಎಲ್ಲಿದೆ ಎಲ್ಲ ಮೀರುವ ಎತ್ತರ
ಎಲ್ಲಿದೆ ಇಲ್ಲಿ ಎಲ್ಲ ಪ್ರಶ್ನೆಗೆ ಉತ್ತರ..?